Banka Botërore, vlerësim pozitiv për klimën e investimeve të huaja në Shqipëri

Klima e investimeve të huaja në Shqipëri ka marrë së fundi edhe një vlerësim pozitiv nga institucionet më të rëndësishme financiare botërore.
Në mbledhjen e Qeverisë së Shqipërisë, Kryeministri Berisha përshëndeti raportin e Bankës Botërore, të Korporatës Financiare Ndërkombëtare dhe BMF, ku nga një analizë që i bëhet klimës së investimeve të huaja në 87 vende të botës, Shqipëria rezulton me 95 për qind, duke tejkaluar me 5 % vendet e OECD-së dhe me 2 % vendet e rajonit.
Ndërsa për të filluar një biznes, sipas Kryeministrit, "Shqipëria arrin në 98 pikë, kundrejt 71 pikë që është mesatarja e vendeve të OECD-së dhe e vendeve të rajonit".
"Pas vlerësimit nga Organizata e Kombeve të Bashkuara me çmimin e dytë në botë për transparencën e prokurimeve 100 % elektronike, ky vlerësim përbën një ndër arritjet më madhore në vlerësimin e reformave tona në drejtim të përmirësimit të klimës së biznesit", tha Berisha.
Sipas tij, "ky është mesazhi më shkëlqyer dhe më inkurajues që Shqipëria i dërgon komunitetit ndërkombëtar të biznesit". "Duhet që përpjekjet të shtohen në të gjithë sektorët dhe Shqipëria të kapë 98 % në çdo fushë të lidhur me biznesin", tha Berisha.