Përleshjet në Hamallaj, burg për të arrestuarit

Durrës
- Gjykata e Shkallës së Parë në Durrës dha masën e arrestit me burg për
tre shtetasit e përfshirë në përleshjen me policinë në fshatin
Hamallaj, ku mbetën të plagosur 4 policë.

Dy prej tyre kanë marrë masën e 20 ditëve burg,
ndërsa personi i tretë përfitoi për shkak të moshës, por do të paraqitet
me detyrim në policinë gjyqësore të Rrethit Durrës.

Prokurori i
çështjes, Vladimir Mara përshkroi në seancë të gjithë ngjarjen që
ndodhi gjatë paradites së enjte kur turma qëlloi me gurë, bomba molotov
dhe shkopinj forcat e rendit. Ai u paraqit me të njëjtat akuza që kishte
ngritur edhe policia, goditje e një punonjësi të policisë për shkak të
detyrës e kryer në bashkëpunim, organizim dhe pjesëmarrje në grumbullime
dhe manifestime të paligjshme, pengim të mjeteve të transportit si dhe
prishje të rendit dhe qetësisë publike. Prokuroria vlerësoi faktin se
nga përleshjet u lënduan 4 efektiva të policisë, 3 prej të cilëve
ndodhen ende nën terapi në spitalin Ushtarak të Tiranës.

Të hënën
pritet të jepet vendimi edhe për 2 shtetas të tjerë, të cilët kanë të
njëjtat akuza, por që u arrestuan një ditë pas ngjarjes.