Pogradec, arrestohet kryeplaku për kultivim droge

Pogradec – Policia e Pogradecit arrestoi sot kryeplakun e fshatit Ondisht në komunën e Trebinjës, Avni Ponçi, i akuzuar për shpërdorim detyre.
Avni Ponçi, 52 vjeç, u arrestua pasi në tokat e tij kishte mbjellë 25 rrënjë kanabis sativa. Mbi të rëndon akuza "Shpërdorim i detyrës zyrtare dhe kultivim i bimëve narkotike".

Po në fshatin Ondisht, policia arrestoi sot edhe shtetasin tjetër, Erion Hyka, 24 vjeç, pasi kishte mbjellë 42 rrënjë kanabis sativa, por ai do te ndiqet penalisht ne gjendje te lire për shkak se është invalid i grupit të parë. Nën pranga ra edhe Mevlan Xhika, 52 vjeç, banor i këtij fshati, i cili kishte mbjellë 28 rrënjë kanabis sativa.

Sipas policisë, bimët narkotike u shkulën dhe u sekuestruan si provë materiale. Ky është rasti i tretë që policia e Qarkut të Korçës gjatë dy javëve të fundit kryen arrestime për veprën penale të kultivimit të bimëve narkotike.