Erdoan nga Bosnja: Paqe, paqe dhe vetëm paqe

Kryeministri Turk, Rexhep Tajip Erdoan, duke folur ne ceremoninë e organizuar në përkujtim të 15-vjetorit të masakrës së Srebrenicës bëri thirrje për paqe.
Erdoan pasi dha shembullin e një nëne e cila edhe pse në masakër ka humbur të shoqin dhe dy bijtë e saj i zgjati dorën Presidentit serb, Boris Tadiç, theksoi se “paqja botërore për këtë ka nevojë, për këto nëna ka nevojë. Ne e dimë se te vrasësh një njeri është sikur të kesh vrarë të gjithë njerëzimin. Në bazë të kësaj hedhim hapat përpara. Dhe për hir të kësaj themi paqe, paqe dhe vetëm paqe”.

Duke theksuar se dinjiteti njerëzor ka pësuar një plagë të madhe me masakrën e Srebrenicës, Erdoan nënvizoi se me këtë masakër është shënuar një njollë e madhe në historinë e Ballkanit dhe të mbarë Evropës.

Kryeministri turk, Erdoan së bashku me Presidentin Gyl, është ndërmjetësuesi i paqes mes serbëve dhe boshnjakëve. Me anë të konferencave të organizuara disa muaj më parë ai mori premtimin nga Presidenti serb, Boris Tadiç se do merrte pjesë në ceremoninë e 15-vjetorit të masakrës së Srebrenicës.