Shitet monedha më e madhe në botë, 3,27 milionë euro

Vjenë
- Monedha më e madhe e arit në botë, me diametër 53 centimetra dhe me
peshë rreth 100 kilogramë, u shit dje në një ankand për 3,27 milionë
euro.

Lajmi bëhet i ditur me anë të një komunikate nga
salla e shitjeve në Vjenë "Dorotheum".
Monedha super e madhe
kanadeze, e cila është përfshirë në librin e rekordeve Guiness, u ble
nga shoqëria spanjolle "Oro Direct", e specializuar në shitjen e
metaleve të çmuara.

Çmimi i saj i shitjes u orientua nga
vlera e peshës së saj (3,2 milionë euro),
shumë më i lartë nga vlera e saj e ligjshme prej një milion dollarë
kanadezë (0,8 milionë euro).

E prodhuar në vitin 2007, nga
njëra anë ajo ka të stampuar portretin e mbretëreshës së Anglisë
Elizabeth II, ende zyrtarisht kryetare e shtetit të kësaj ish-kolonie
britanike dhe në anën tjetër me tri gjethe panje, emblema kombëtare e
Kanadasë.